IBERIANA-2 – იბერია გუშინ, დღეს, ხვალ

• ღია წერილი ბ-ნ გიორგი ასათიანს და „ახალი ეროვნული მოძრაობის“ მესვეურთ!

 

• ს. ე. გ. მ.

asatiani

ღია წერილი ბ-ნ გიორგი ასათიანს და

„ახალი ეროვნული მოძრაობის“ მესვეურთ!

   ბ-ნო გიორგი! ხშირად ვუყურებდით თქვენი მონაწილეობით სატელევიზიო გადაცემებს და მოხიბლული ვრჩებოდით! სხვა ანალოგიური ტელეწამყვანებისგან განსხვავებით აღგითქვით პიროვნებად, რომელსაც პოლიტიკური, კარიერისტული მიზნები კი არ გამოძრავებთ, არამედ მხოლოდ სამშობლოს სიყვარული! ამიტომაა, რომ ბევრმა ჩვენთაგანმა გულწრფელად შემოგთავაზეთ მეგობრობა!

hqdefault2   არ ვიცით ახლა გადაწყვიტეთ პოლიტიკაში ძალების მოსინჯვა, თუ უბრალოდ ახლა იფეთქა თქვენში უთქმელობით დაგუბებულმა 28 წლიანმა ბოღმამ. იცოდეთ სამ-შობლოს თავის-უფლებას შეწირული გმირები, რომლებსაც ხალხი დიდი პატივისცემის აღსანიშნავად მხოლოდ სახელებით მოიხსენიებს როგორც: ზვიადი და მერაბი, მათი თქვენეულ კონტექსტში მოხსენიებით ვერ ამაღლდებით.  ამასთან 1989 წლის 9 აპრილს, გამთენიისას იქ მდგომი ქართველი ერი (დიახ იქ იდგა ქართველი ერი ზოგი ფიზიკურად, ყველა კი სულიერად!!!) პრაქტიკულად ბრბოდ გამოაცხადეთ, აღარაფერს ვამბობთ იმ ღამით ზვარაკად შეწირულ 22 ქართველზე.

   მთელი თქვენი გადაცემები აგებული იყო წმინდა ბერი გაბრიელის და მისი სულიერი შვილის, ბერი ნიკოლოზისადმი ხოტბა დიდებით! ამიტომაც გიყურებდათ და გიყვარებდათ ხალხი. ნუთუ ეს ყველაფერი სპეციალურად კეთდებოდა, რათა ამ ხალხის სიმპატია დაგემსახურებინათ? ეს თქვენი კარიერისტული გათვლა იყო, თუ ვინმეს მითითებით მოქმედებდით?

   ბუნებრივია ასეთი კითხვები გაუჩნდება კაცს, როდესაც ხედავს კარდინალურად როგორ იცვლება თქვენი დამოკიდებულება მდუმარე ბერისადმი და ახლა უკვე იმ ხალხს აქებთ და ადიდებთ (გვერდში უდგახართ) ვინც დევნიდა და დღესაც დევნის მას?! ასევე წმინდა ბერი გაბრიელის მეხოტბე ადამიანი არ იზიარებთ მის ერთ-ერთ (მთავარ) მოსაზრებას: „ზვიადის მტერი, ერის და სარწმუნოების მტერია!!!“ ამის გამო დევნიდნენ მას, გასული საუკუნის 90-იან წლებში სამშობლოს გამყიდველთა კასტა, სასულიერო – საერო საზოგადოებიდან და ახლა მისი ყველაზე „გულანთებული“ მიმდევრები გახდნენ?! ნუთუ თქვენც იმ „კოჰორტის“ წევრი ხართ, რომლებიც ტყვიას არ იშურებდნენ საკუთარი თანამოძმეებისადმი?

   თქვენში ჩაგუბებული 28-წლიანი ბოღმის ამოფრქვევით, ჩირქი მოსცხეთ ქართველი ერის თავისუფლებისათვის 9 აპრილის ღამეს ზვარაკად შეწირულთა სულებს. ამით თქვენ შეუერთდით იმ „სახელოვან ინტელიგენციას“, რომლებიც იმასაც კი ბედავენ ცინიკურად „იღადაონ“ (გვაპატიეთ ჟარგონისთვის) 100 000 წამებულსა თუ დიდგორის ომზე?! ეს ხომ თანამედროვე მანქურთთა ხელობაა. ასეთ მანქურთებზეა ნათქვამი: ქვეყანას არ ჰყავს უფრო დიდი მტერი, ვიდრე დამპყრობლის კარზე გამოზრდილი ინტელიგენცია (დღეს კი უკვე,  არაქართული ძალის, ხელშეწყობით  დაფინანსებული სამთავრობო, არასამთავრობო და სხვადასხვა პარტიების წარმომადგენლები). დიახ მანქურთები, რადგან ისინი ქართველები რომ იყვნენ, ადვილად გაიგებდნენ: რატომაა, რომ 40 000 ქართველს შეუძლია ელვის სისწრაფით გაანადგუროს ნახევარ მილიონამდე მომხდური და ამავე დროს 100 000 ქართველმა ნებაყოფლობითა და აბსოლუტური მორჩილებით კისერი შეაგებოს, იგივე მტრის მახვილს!!!

   ასეთი ისტორიის მქონე ერის შვილმა შეიძლება იკადროს და თქვას: „არავითარი საქართველო უპირველეს ყოვლისაო“???!!! ეს ხომ ერთ-ერთი მთავარი მოწოდება იყო 9 აპრილის დღეებში აზვირთებული ქართული სულისა! აი ამ აზვირთებულ სულს თელავთ თქვენ და ე. წ. „ქართული იდეა“??! ზუსტად ასე მოაზროვნე შემოქმედდთა „შედევრია“ დღევანდელი 9 აპრილის მემორიალი, სადაც თვალნათლივ ჩანს, რომ ეს მებრძოლი ქართული სული მარწუხებში (8  მარცხენა  ხელი ??!) მოაქციეს, რათა   არ გავრცელდეს მებრძოლი ქართული სული?! ამასთან ასეთი ბრძოლა და თავშეწირულობა მამულისადმი, მხოლოდ მარცხად აღითქმებოდეს?! უბრალოდ თქვენი ასეთი მოწოდებით, „არავითარი საქართველო უპირველეს ყოვლისა“, ღირსეულად  შეავსეთ იმ ვაიპატრიოტთა რიგები, რომლებმაც 1992 წლის 6 იანვრის შემდეგ პირველი რაც მოიმოქმედეს ის იყო, რომ პირისაგან მიწისა აღგავეს, 9 აპრილს ზვარაკად შეწირული მამულიშვილების დაქცეული სისხლის ადგილს აღმართული, ეროვნული მოძრაობის მთავარი ლეიტმოტივის გამომხატველი ბანერი-მონუმენტი: „ენა, მამული, სარწმუნოება!“

   და ახლა თქვენ აანონსებთ „ახალი ეროვნული მოძრაობის“ დაწყებას? ცნობისთვის, ეს ტერმინი პირველად ნაციონალური მოძრაობის შემოტანილი ტერმინია და დიდ იმედებს ამყარებდნენ მასზე ადგილობრივი არჩევნების დროს. მაშინ მათ ეყოთ იმის ჭკუა, ხალხის უკმაყოფილების პირველივე გამოვლენაზე შეწყვიტეს ამ საკითხზე ლაპარაკი! კარგი იქნება თუ თქვენც მიბაძავთ მათ და ამით შეწყვეტთ თავად ტერმინ „ეროვნული მოძრაობის“ დისკრედიტაციას! (ისე კი ბაძავთ სხვა მხრივ, როდესაც ხელისუფლებაში არ მოსულნი წინასწარ გვპირდებით ხელების მომტვრევას??!). განმარტებისთვის კი გეტყვით, რომ ეროვნულ მოძრაობას არ გააჩნია ძველი და ახალი დრო! ეროვნული მოძრაობა ის დანთებული ჩირაღდანია, რომელიც აგიზგიზდა 1801 წლიდან ალექსანდრე ბატონიშვილისა და დარეჯან დედოფლის მიერ! იგი არასდროს ჩამქრალა ქართველ ერში და რომელიც, ხშირად,  დროდადრო მძლავრ კოცონად გადაიქცევა 9 აპრილის მსგავს ეროვნული სულის ამოფრქვევით, თუ აჯანყებებით!

   ან რას ნიშნავს „ესტაფეტას ვიღებთ ეროვნულ მოძრაობაში“? კერძოდ ვისგან იღებთ? ვინ გადმოგცათ???!!! აგვიხსენით ყველას! პირველ რიგში კი აუხსენით იმ ნატანჯ და ნაწამებ ხალხს, ვისაც 30 წელია სისხლი აქვთ ჩაქცეული ამ მოძრაობაში. ვისგან ეს ესტაფეტა? იმათგან ხომ არა, ვისაც ამა თუ იმ ფორმით მონაწილეობა აქვს მიღებული  საქართველოს კანონიერი პრეზიდენტის და საკუთარი ქვეყნის მოსპობა გაპარტახებაში?

  ეს ნამდვილად ასეა, რადგან „ჩვენი კეთილმოსურნენი“ კარგად ხედავენ, რომ დრო დგება, როცა ქართველი ერი ერთ მუშტად იკვრება. ცხადია ისინი ამას არ დაუშვებენ და „ასპარეზზე“ თანდათანობით გამოჰყავთ სხვადასხვე ე. წ. პატრიოტული ძალები. მათი მეშვეობით სურთ ააცდინონ ქართველი ერი ჭეშმარიტების გზას. თქვენ ახალი აღმოჩენაც კი გააკეთეთ და დიდი სიამოვნებით გვამუნათებთ, რომ თქვენს მიერ დაანონსებული „ახალი ეროვნული მოძრაობა“ დაფუძნებულია სარწმუნოებაზე???!!! თქვენ საერთოდ თუ გესმით რა არის ეროვნული მოძრაობა? განა შეიძლება არსებობდეს ეროვნული მოძრაობა სარწმუნოების გარეშე? ძალიან გინდათ გონება დაუბნიოთ ქართველ ერს, მაგრამ ამას ვერ შეძლებთ! საერთოდ თუ გაქვთ წარმოდგენა რა არის საქართველოს სულიერი მისია და ეროვნული მოძრაობის არსი? კარგად დაიმახსოვრეთ:

   „ჩვენ ვიბრძოდით და ვიბრძვით ჩვენი წინაპრების რელიგიური და ეროვნული იდეალების აღორძინებისათვის! …

   ჩვენი მოძრაობა უწინარეს ყოვლისა რელიგიური მოძრაობაა, რამეთუ რელიგიის გარეშე არ არსებობს ჭეშმარიტი ეროვნული აღორძინება!“ /ზვიად გამსახურდია, 1990 წლის 14 ნოემბერი, უზენაესი საბჭოს სესია/.

   „ქართველი კაცი კიდევ ერთხელ ამბობს უარს ამქვეყნიურ, ფიზიკურ კეთილდღეობაზე, სულისმიერი ეროვნული აღორძინების სახელით!“ / ზვიად გამსახურდი , 1991 წლის 7 ივნისი, პრეზიდენტის ინაუგურაცია/.

   აი ამ სულიერებაზე უარის ართქმის გამო დაამხეს კანონიერი ხელისუფლება, ფიზიკურ კეთილდღეობას აყოლილმა, კრიმინალურმა, ნაძირალათა ბრბომ და ახლა ახლადგამოჩეკილი ე. წ. ეროვნული მოძრაობები იჩემებენ სარწმუნოებრივობაზე ზრუნვის პირველობას??! ამიტომ ცდილობენ ლაფში ამოსვარონ განუყოფელი ძმა და მეგობრების, მერაბის და ზვიადის სახელები, რათა შემდეგ თავად მიითვისონ ეროვნულ მოძრაობაში სარწმუნოებრივი ნიშა?! ვაი თქვენს უგუნურობას, რამეთუ არ იცით, რომ 80-90იან წლებში ამ ადამიანების ლაფში ამოსვრა განუყოფელი თვისება იყო იმ პერიოდში ეროვნულ მოძრაობაში ჩაბუდებული ბოროტების განსახიერებისა. მათ იცოდნენ რა ამ პიროვნებების ქრისტიანული მიმტევებლობა მოყვასისადმი, ყველაფერს კადრულობდნენ, რადგან რაც არ უნდა მომხდარიყო იცოდნენ, რომ ისინი შეუნდობდნენ მათ?!!

   ახლაც, ყველას კარგად მოგეხსენებათ, რომ ჭეშმარიტი ეროვნული ძალები მტკიცედ მიჰყვებიან ზვიადის და მერაბის იმ პრინციპებს, რომ: „ჩვენ უნდა ავმაღლდეთ ყოველგვარ პიროვნულზე, პიროვნულ წყენაზე მაღლა მეგობრებო. პიროვნულ წყენას და შეურაცხყოფას ვინც ვერ პატიობს მოყვასს, იმას პოლიტიკაში და ეროვნულ მოძრაობაში ადგილი არ აქვს! ეს გახსოვდეთ ყველას! ყველას გახსოვდეთ ეს!“ (ზვიად გამსახურდიას სიტყვა წარმოთქმული 1990 წლის 28 ოქტომბრის ღამეს, არჩევნებში ტრიუმფალური გამარჯვების შემდგომ). ამიტომაც დიდსულოვნებით, მოყვასისადმი სიყვარულით და ქრისტიანული შემწყნარებლობით გამოირჩევიან და გარკვეულმა ძალებმა ჩათვალეს, რომ მათ ნებისმიერი სიბინძურე ეპატიებათ?!

   როგორც ეტყობა, დროა, დამთავრდეს ასეთი მიმტევებლობის დრო, რათა ერთხელ და სამუდამოდ დამთავრდეს მედროვეებისა და ნაძირლების პარპაში, რადგან ახლა ეს ყველაფერი პირადი შეურაცხყოფა აღარაა. ეს ყოველივე უკვე საქართველოს ნამდვილი გმირების შეურაცხყოფაა! ეს არის თვით ეროვნული მოძრაობის შეურაცხყოფა და 9 აპრილს ზვარაკად შეწირულთა სულების შეურაცხყოფა!

   ან იქნებ აგვიხსნათ, თუ რატომ აცხადებთ „ახალი ეროვნული მოძრაობის დაწყებას“ და არა „ახალი სარწმუნოებრივი მოძრაობის დაწყებას“? იქნებ იმიტომ, რომ ხალხის თვალში ნაცრის შეყრა გსურთ? ასეთი სურვილი ნამდვილად ექნებათ თქვენი „ახალი ეროვნული მოძრაობის“ მესურვეთ, რომლებიც თვალნათლივ ხედავენ თავიაანთი 25 წლიანი მოღვაწეობის კრახს! კრახს, რადგან ამ 25 წლიანი რეპრესიების, წამებების, ტოტალური ძარცვის და ათასობით ჩვენი თანამებრძოლის ლიკვიდაციის მიუხედავად, ვერ ჩაკლეს ქართველ ერში ეროვნული სული! ახლა კი დაინახეს რა ჭეშმარიტი ეროვნული მოძრაობის აღორძინების გარდაუვალობა, ცდილობენ ჩანასახშივე დისკრედიტაცია მოახდინონ ასეთი გაერთიანების. ამიტომ აპიარებენ ვითომც და გაერთიანების იდეით აღტკინებულ ვაი პატრიოტებს?!

   ისევ და ისევ კითხვა, რატომ არა “ახალი სარწმუნოებრივი მოძრაობა“? პასუხი ნათელია – ამ შემთხვევაში მწარედ მოგხვდებოდათ ყველას (და მართალიც იქნებოდა). აბა რამ და ვინ გაყო ქართველი ერისთვის ეროვნული და სარწმუნოებრივი?

   საერთოდ საათობით ქადაგებდით სარწმუნოებაზე თქვენს გადაცემებში და ძალზე სწორი მიდგომა იყო ეს! ჯობია დაუბრუნდეთ საწყისებს და აკეთოთ ისევ ის, რამაც ხალხის სიყვარული მოგაპოვებინათ! ამასთან, წინადადებასაც შემოგთავაზებთ, გთხოვთ თქვენს გადაცემებში დიდი ადგილი დაუთმოთ ბიბლიის, ძველი და ახალი აღთქმის სრულყოფილად გააზრებას და ამ მიზნით პოლემიკები მოაწყოთ ბიბლიის მცოდნეთა შორის! ჩვენის მხრივ, ამ მიზნით შემოგთავაზებთ ბიბლიის და ვეფხისტყაოსნის უბადლოდ მცოდნე პიროვნებებს, რათა ყველამ კარგად გაიგოს და შეისისხლხორცოს ბიბლიისა და ქართული სულიერი არსის განუყოფლობა!

   მართალია აქ გამოთქმული მოსაზრებები უშუალოდ თქვენ არ გეხებათ მხოლოდ. უბრალოდ ნათქვამია: მულო შენ გეუბნებიან, რძალო შენ გაიგონეო!

   ამასთან ჩვენ ყოველთვის ვმოქმედებთ შემდეგი პრინციპებით: „საქართველო შენ სადა გყავს შვილი დასაკარგავი!“ და რომ „ძმამ ძმას ანგარიში უყო და ისევ ძმებად დარჩნენო!“

    საჯარო სივრცეში თქვენეულ მიდგომებთან დაკავშირებულ პოლემიკაში ხშირად კითხულობთ: „რა იცით მე ვინ ვარ და რა მიკეთებიაო?“ პასუხი ერთადერთია: „საქმემან შენმან გამოგაჩინოს!“

ბაკურ ეფენია                                                      

გია ჩუთლაშვილი                                                           

თამაზ ხუციშვილი                                                            

გოდერძი ალექსანდრია                                                            

მერაბ კუკავა

 

Advertisements

6 Responses to “• ღია წერილი ბ-ნ გიორგი ასათიანს და „ახალი ეროვნული მოძრაობის“ მესვეურთ!”

  1. გია ჩუთლაშვილი said

    ბ-ნ გიორგი ასათიანს

    თქვენმა პასუხებმა კიდევ ერთხელ დაგვარწმუნა ჩვენს სიმართლეში, როდესაც ყველანაირად ცდილობთ გვერდი აუაროთ და უშუალო პასუხი არ გასცეთ ძირითად საკითხებს. ამასთან პოლემიკაში ბოლოს აღნიშნავთ, მომიტევეთ და ამით პოლემიკა დავამთავროთო!
    ჩვენ, რომ უაღრესად მიმტევებელნი ვართ დადასტურებულია ბოლო 25 წლიანი ისტორიით! ჩვენთვის არ არსებობს პირადული და უაღრესად მიმტევებელნი ვართ. მაგრამ როდესაც საქმე სამ-შობლოს და მისი დიდებისთვის შეწირულ მამულიშვილებს ეხება – უკომპრომისონი ვართ! მიმტევებლობის შესანიშნავ მაგალითებს გვაძლევენ ჩვენი უღალატო უფროსი მეგობრები, როდესაც მაგიდასთან პირისპირ ესაუბრებიან მათ, ვისაც ფული ჰქონდათ აღებული მათ მოსაკვდინებლად, ამასთან მზად არიან მიუტევონ მათაც კი ვის ნასროლ ტყვიას დღემდე გულით დაატარებენ (25 წელია, გულიდან ერთ სანტიმეტრში გაჩერებულს)! ოღონდ კი აღიარე და თქვი: მაპატიეთ შევცდი!
    ღმერთმა ყველას მიუტევოს, ვისაც შეუძლია გულწრფელი მონანიება! მონანიება შეუძლიათ კ ა ც ე ბ ს !!! ლაჩრები და კარიერისტები არასდროს მოინანიებენ თავიანთ ქმედებებს და ყველა ფორმით ცდილობენ მათ გამართლებას. ამჯერად კი აუცილებლად მიგვაჩნია რამოდენიმე მოკლე განმარტება გავაკეთოთ თქვენს პასუხებზე ღია წერილისადმი:
    ბერ ნიკოლოზთან მიმართებაში იხილეთ თქვენივე ქრნიკაში გამოქვეყნებული ბ-ნი დავით კარტოზიას მიმართვა. რისთვის იხდის იგი ბოდიშს? ნუთუ მასაც ეჩვენება?!
    ბევრი ცდილობს თავი წარმოადგინოს წმიდა ბერი გაბრიელის შესახებ ერთადერთ ინფორმაციის წყაროდ?! ნურვის გონია, რომ ყველას მოკლე მეხსიერება აქვს და აღარავის ახსოვს რა ხდებოდა 90-იან წლებში!
    გვეკითხებით, თუ სად წავიკითხეთ ან ვნახეთ: „არავითარი საქართველო უპირველეს ყოვლისა“. გადაცემის მსვლელობისას ალბათ კარგად ვერ აღითქვით, ამიტომ გადახედეთ ისევ და ისევ თქვენს ქრონიკაში არსებულ ამ გადაცემის ჩანაწერს და მაშინ იმედია ასეთ კითხვებს აღარ დასვავთ.
    30 000 კერპთაყვანისმცემელი???!!! (თანდათანობით მიუახლოვდებით მოსახლეობის 97%-ს, რომელმაც ხმა საქართველოს დამოუკიდებლობას მისცა). იგივე ტონალობაში აგრძელებთ, რაც იმ გადაცემის დროს, როდესაც ამდენ სამშობლოსათვის გულანთებული ადამიანი პრაქტიკულად ბრბოდ გამოგყავთ???!!! ამასთან თურმე წინააღმდეგი იყავით პრეზიდენტის ინსტიტუტისა???!!! რატომ? დაგვისახელეთ ერთი მაგალითი მაინც პრეზიდენტ გამსახურდიას შეცდომისა! იმედია „ცრუ თენგიზად“ წოდებულის დემაგოგიას აღარ გაიმეორებთ, ან იქნებ „იანაევის დაკითხვის ოქმები“ გაქვთ ახლა მაინც.
    საქმე იმაშია, რომ ეს ტონი, 1990 წლიდან მოყოლებული, პირდაპირი ანარეკლია ე.წ. „ეროვნული კონგრესის“ მესურვეთა იდეოლოგიის, როდესაც თავიაანთ თავებისა და მათზე მიტმასნილი „იმპერიის კარზე გამოზრდილი ინტელიგენციის“ გარდა ყველას ბრბოს უწოდებდნენ?!
    სხათაშორის ძალიან გახშირდა ამ ე. წ. „კონგრესმენების“ და მათი მესურვენის აქტიურობა, როდესაც დროის და შესაბამისად ახლა უკვე კანონიერების აღდგენის აუცილებლობის და ბ-ნი ზვიადის ქება დიდების მანტიაში გახვეულებმა, აიტაცეს ქართველების გაერთიანების აუცილებლობის იდეა და ასეთი გაერთიანებების სათავეებთან მიძვრებიან, რათა კიდევ ერთხელ ააცდინონ ქართველი ერი ჭეშმარიტების გზას, ასეთი გაერთიანების მცდელობა იყო სულ ახლახანს და ახლაც ამის არაერთი მცდელობა მიმდინარეობს, რაც ჩვენ ბუნებრივ მოვლენად მიგვაჩნია. მთავარია დროულად რეაგირება და მხილება მოხდეს რათა არ მოხდეს ქართველების გაერთიანების იდეის არასასურველი მიმართულებით წარმართვა.
    რაც შეეხება 100 000 წამებულის, დიდგორის ომის და 9 აპრილს ზვარაკად შეწირულების ერთ კონტექსტში მოხსენიებას ეს სხვა არაფერია თუ არა სამშობლოს უსაზღვრო სიყვარული! რწმენა იმისა, რომ ქართველების ერთად დგომა გამარჯვბაა! რწმენა, რწმენა და რწმენა! ამ რწმენამ არ დააბიჯებინა ფეხი ხატზე 100 000 ქართველს, ამ რწმენამ გაამარჯვებინა 40 000 ქართველს აურაცხელ მტერზე და ამ რწმენამ ფეხი არ მოაცვლევინა ქართველებს 9 აპრილის ღამეს!!! აი ამ რწმენის ეჭქვეშ დაყენებაა შეურაწყოფა ქართველი ერის.
    ბევრი ცდილობს ისარგებლოს პატრიარქის უსაზღვრო პოპულარობით და მისი სახელი დაუპირისპირონ ჭეშმარიტ ეროვნულ მოძრაობას?! დიახ პატრიარქი მოვალე იყო მისულიყო იმ ღამით მომიტინგეებთან (ქართველ ერთან) და ეთქვა ის რაც თქვა! მაგრამ აბა კითხეთ პატრიარქსა: ამაყობს თუ არა იგი იმ ერით, რომელიც იმ წუთებში იქ იდგა, ფეხი არ მოიცვალა და განსაცდელს ამაყად შეეგება! ნახავთ რას გიპასუხებთ. ან კითხეთ როგორც ერისკაცი თუ დატოვებდა იმ დროს ბრძოლის ველს. დიახ ნახავთ რას გიპასუხებთ!
    და საერთოდ იმ ქართველების პატრიოტობა, რომელთაც სულკურთხეული მერაბის სიტყვა: „ერის ისტორიაში ყოფილა …“ ერთხელ მაინც არ გაუყინავს ძარღვებში სისხლს და მერე მთის მდინარესავით არ აუჩუხჩუხდება, მათი პატრიოტობის უბრალოდ არ გვწამს!!!
    ასე რომ ყოველგვარი მცდელობა პატრიარქი დაუპირისპირონ ჭეშმარიტ ეროვნულ მოძრაობას ძირშივე მცდარია!!! ხოლო როდესაც საუბრობთ უშუალოდ ჩვენს დამოკიდებულებაზე პატრიარქისადმი, ელემენტარულად საჭიროა იცნობდეთ ჩვენს ოფიციალურ მიმართვას. როდესაც მოწიწებით ვთხოვთ: აიღოს უდიდესი ტვირთი და დაპირისპირებულ ქართველებს შორის ჩატეხილი ხიდის აღსადგენად ბურჯად აღიმართოს, გვიხმოს ყველას ერთად, რათა მოვინანიოთ ვით ნინევიელებმა და ერთობით ლოცვა აღვავლინოდ უფლისადმი. და ეს მიმართვები კეთდებოდა ჯერ კიდევ მაშინ, როდესაც ბევრი დღევანდელი მეხოტბე ქართველების ერთიანობისა არც კი კადრულობდა ამ თემაზე ჩვენთან საუბარს რადგან მაშინ ეტყობა ამის დრო არ იყო! ბოლოს კი ყველა ქართველს შემდეგი იმედისმომცემი სტრიქონებით მივმართავ:

    გჯეროდეს! ინებებს ღმერთი, დაგვიდგენს ისეთ ჟამს,
    ზარების რეკვით, როდესაც ყველას მოგვიყრის თავს! ქართული სული აღორძინდება იმავე წამს!
    ახდება ნატვრა – საქართველო კვლავ გაბრწყინდება!!! ამენ!

    გია ჩუთლაშვილი

    • George Asatiani said

      აი, ვკითხულობ ესხლა თქვენს პოსტს და მეღიმება…, რამე აზრი აქვს რომ ისევ გავიწაფო და ავხსნა- განვმარტო? ისევ ჩემი პასუხის ბოლო ანზაცს მოვიყვან აქ და იმ ვიდეო ლინკსაც დავდებ სადაც ეკრანიდან ვქადაგებ საყოველთაო სიყვარულზე და ამის, მერე კიდევ თუ მართულს მიწოდებ და არ გაჩერდები ნამდვილად პასუხს მოგთხოვ მაგაზე!!!!

      მე ,ამ ბოლო დროს, ბევრგან წავიკითხე, რომ თურმე წმინდა გაბრიელ ბერი და მამა ნიკოლოზი გამოვიყენე კარიერისტული მიზნებისთვის და ხალხში მოვიპოვე პოპულარობა და შემდეგ ისინი გვერდზე გავწიე (ე.წ. „ძლევაი საკვირველი“ , მამა ნიკოლოზის ე.წ. „მრევლი“ და სხვ), ესეც გაუგონარი ცილისწამებაა და ელემენტარულად იმისაც კი ვერ ხვდებით, რომ ასე რომ იყოს, როგორ, წმინდა ბერი და მისი მორჩილი არ მამხელდა ამაში? მაგდენი ძალა და ნება არა აქვთ, რომ ასეთი გაუგონარი მზაკვრობა აღხოცონ და გამაჩერონ? ან გამიჩერონ ტელევიზია, რომელსაც ზურგით და საკუთარი ჯიბით ვინახავ იმისთვის, რომ სიმართლე არ დაიკარგოს? რა გულით არ მივიღეთ თქვენი წრიდან ნიკო ნადირაშვილი და გვერდით არ ვუდექით? საიდან ასკვნით ასეთებს ადამიანებო? მოდით აქ გავჩერდები და ჩემს პასუხს თქვენს ღია წერილზე ამ ისტორიით დავამთავრებ: „ერთხელ უწმინდესს მიუტანეს საპატრიარქოს თანამშრომლის დაწერილი წერილი (ეს ხდება დაახლობით 14 წლის წინ), სადაც აღწერილი იყო გარკვეული მანკიერი მოვლენების შესახებ. უწმინდესმა ავტორი თავისთან მოიხმო და 2 კითხვა დაუსვა: – შვილო, ეს შენ დაწერე? – დიახ უწმინდესო – მიუგო ავტორმა, – მე მხოლოდ ერთი კითხვაღა მაქვს შენთან შვილო, – მკითხეთ უწმინდესო – ღამე როგორ გძინავს შვილო?“
      ღმერთმა დაგლოცოთ ყველანი, ვინც სამშობლოზე, მოყვასზე, სიკეთეზე, ცხონებაზე და თუნდაც ჩემზე ფიქრობთ, გაგახაროთ მამაზეციერმა ორთავ სოფელსა შინა და თქვენს ბოლო მოწოდებას „საქმემან შენმა გამოგაჩინოს შენო“ ამ ეტაპზე, ამ ვიდეოთი ვუპასუხებ, ხოლო დანარჩენს კი დარჩენილი ცხოვრებით დედამიწაზე. https://www.youtube.com/watch?v=By9pFteQW00

      გიორგი ასათიანი

  2. დავითი said

    არც მიკვირს. არასდროს ვენდობოდი გიორგი ასათიანს.

    • მზისო ნავროზაშვილი said

      გენაცვალეთ, ჩემო ქართველებო! ამათ ჰგონიათ საქართველო ბრმაა და დაიჩოქა საბოლოოდ, ახალ-ახალ “ლიდერებს”აცხობენ.ჩვენმა დუმილმა გაანებივრ-გაალაღათ.”ზარების რეკვით, როდესაც ყველას მოგვიყრის თავს! ქართული სული აღორძინდება იმავე წამს!
      ახდება ნატვრა – საქართველო კვლავ გაბრწყინდება!!! ამენ!”

      ჰე ამენ,იყავნ!!!

      • George Asatiani said

        ქალბატონო მზია, არ გრცხვენიათ ასეთი ცილისწამებისთვის? ჩვენ გვგონია, რომ საქართველო ბრმაა? და გამომცხვარი ლედერები გვყავს? 25 წელი დუმხარტ და ეხლა ამოყავით თავები? რისი მაქნისები ხართ მცნებბშიც კი ვერ ერკვევით ! გამრწყინების არსი მაინც გესმოდეთ და ჩემი თუ არ გჯერათ რომ არ გესმით გადაშალეთ ზვიადის “ესსეები” და იქ მაინც წაიკითხეთ რას წერ ცხონებული ზვიადი ამ თემაზე გაუნათლებლობასთან კამათი ყველკაზე დიდი სირთულეა ამ ქვეყანაზე (მე თქვენ არ გგულისხმობთ ქალბატონო მზისო, ზოგადად ვაგრძელებ პასუხს ღია წერილისადმი), რამდენიც არ უნდა აუხსნა მაინც ვერ მ იიღებ შედეგს იმიტომ, რომ კედელივით მყარია მისი ლოგიკა, უბრალოდ არ ესმის რასაც უხსნი. ეეეჰჰ… დრო ყველაზე დიდი წყალობაა ამქვეყნად….

  3. George Asatiani said

    პასუხი ღია წერილისადმი გიორგი ასათიანი მიმართ
    ძვირფასო თანამემამულენო!
    განსაკუთრებით კი მეომარნო ქრისტესანნო!!!

    ამ წერილის დაწერა გადამაწყვეტინა რამდენიმე ერისკაცის მიერ ჩემდამი მოწერილმა „ღია წერილმა“ და მიუხედავად იმისა, რომ თითქმის 2 წელიწადია ის აზრები, რასაც აქ გავაჟღერებ, უკვე გადმოცემული მაქვს ჩემი საავტორო გადაცემების მეშვეობით, მაინც საჭიროდ ჩავთვალე ამ წერილში თავი მოვუყარო ყველა ამ ნააზრევს და სიყვარულის ალში გავლებული გადმოგცეთ თქვენ, ჩვენო ერისკაცნო და სიკეთისთვის, უფლისთვის თავდადებულნო და არა მარტო თქვენ, არამედ ყველა დაბადებულო ადამიანო, ვინც კი ინებებს და მოისურვებს ამ წერილის არსის გაცნობას. მაშ ასე დავიწყოთ:
    წერილის ავტორები მომმართავენ, რომ ჩემი გადაცემების ხშირად ყურების დროს მოხიბლულნი რჩებოდნენ, ჩემი მხრიდან არაპოლიტიკურობის და არაკარიერისტული მიზნების და სამშობლოს სიყვარულის გამო და გულწრფელად დავიმსახურე მათი მეგობრობა, ხოლო ამ ბოლო დროს ლევან ჩაჩუასთან ერთად გადადგმულმა პოლიტიკურმა ნაბიჯებმა მათში ეჭვი გამოიწვია ჩემი გულწრფელი მიზნების თაობაზე.
    მეგობრებო, პირველ რიგში ღმერთმა დაგვიფაროს ჩვენ, ყველანი ერთად ხიბლისგან, რამეთუ ეს მდგომარეობა – ხიბლი – არის უფლისთვის არასათნო მდგომარეობა და მე გირჩევთ სიტყვა მოხიბლულის ნაცვლად გამოიყენოთ სიტყვები -აღტაცება, სიხარული, იმედი და სხვ.. შემდეგ, რაც არ უნდა საზიზღარი იყოს წარსული, მართლმადიდებელი ადამიანისთვის ბოღმიანობა (თქვენი ტერმინია) მითუმეტეს 28 წლიანი, არ არის შესაფერისი. მე ღიად და აშკარად ვაცხადებ, რომ ზვიადიც და მერაბიც არიან მეწამულნი, სამშობლოზე უზომოდ შეყვარებულნი და შეწირულნი და გარდა ამისა შეიძლება ვუწოდოთ მათ გმირებიც!!! დიახ ამას მე ვამბობ და სულ გავიმეორებ, ოღონდ სიმართლის თქმაში ეს ვერ დამაბრკოლებს და აი, რაში მდგომარეობს ეს სიმართლე (რისთვისაც დავიმსახურე თქვენი „გულისწყრომა“ და უფალმა განგვსაჯოს ჩვენს მართებულობაში).
    თქვენ ძალიან ხშირად სხვებთან ერთად მიმითითებთ, რომ მე კარდინარულად შევიცვალე ჩემი დამოკიდებულება მამა ნიკოლოზისადმი. მე გპასუხობთ, რომ ეს არის წმინდა წყლის სიცრუე! და არსად მსგავსი რამ მე არ მითქვამს და თუკი, ვინმეს რამე ეჩვენება აქ, ვასაჯაროებ, რომ მამა ნიკოლოზის ღალატი ჩემთვის უფლის ღალატის ტოლფასია და ეს თემა იწვევს ჩემში ძალიან დიდ გულისტკივილს, რადგან არ გესმით, რომ ტაქტიკის შეცვლა ბოროტთან ბრძოლაში არ არის ღალატი! არამედ, პირიქით სიკეთის, ერთგულების ტოლფასია და ნიშნავს მარგალიტების არ დაყრას ღორებთან, რომ შემობრუნებულებმა არ დაგვგლიჯონ, ისე, როგორც ეს დაემართა იმ თაობას, ვინც 1989 წლიდან ედგა ეროვნულ მოძრაობას სათავეში. თქვენ ახსენებთ 9 აპრილს ზვარაკად შეწირულ 22 ქართველს (სინამდვილეში დაღუპულთა და დაკარგულთა რიცხვი გაცილებით მეტია და დაფარულია). ეხლა მე გთავაზობთ ვიდეო „ლინკს“, სადაც აღწერილია ზვიადის, მერაბის და პატრიარქის საუბარი და ყველას ვთხოვ დაუკვირდეს რა აზრთა ჭიდილია ამ 2 წუთიან სიუჟეტში. ერთს ვიტყვი, ზვიადი ამბობს – „რომ მოვუწოდოთ ხალხს ვერ გაგვიგებენ და მოღალატეებად ჩაგვთვლიან“ მერაბი ამბობს „ეხლა, აქ დიდებული წამიაო“, პატრიარქი მოიუთითებს, რომ „არსებობს სხვა გზაცო“. დანარჩენი იხილეთ აქ: https://www.youtube.com/watch?v=TUH0IvJeKwI&feature=youtu.be. რას ნიშნავს ეს? ერის სულიერი მამა მოუწოდებს ლიდერებს, რომ გადავარჩინოთ ხალხი დაღუპვასო! და მას არ ემორჩილებიან! ეს არის ელემენტარული ურჩობა და აქ ჩანს სწორედ ის, რასაც თქვენ, ჩემო კეთილისმსურველებო (იმედი მაქვს, რომ ასეა და არა პირიქით) ასე საგულდაგულოდ მალავთ, ან გვერდს უვლით და რას ვგულისხმობ მე აქ? დიახ, წმინდა გაბრიელ ბერის სინანულით ნათქვამ ფრაზებს, რასაც უამრავი მომსმენი და მხილველი ყავს (პირადად უთხრა მამა ზურაბ ცხოვრებაძეს) მაგალითად: „მოკლავენ, თავში ტყვიით… – რატომ მამაო? – „მამას განუდგა“ – მამა ვინ არის? – პატრიარქი“. ჩემო საყვარელნო, მაპატიეთ, მაგრამ თუ ეს სიტყვები არ უთქვამს წმინდა ბერს, მაშინ მე ვარ ცილისმწამებელი და ვიმსახურებ ჯოჯოხეთს, ხოლო თუკი ეს სიმართლეა, მაშინ თქვენ, დიახ თქვენ არ გაქვთ დასაფიქრებელი მასალა? რას ნიშნავს ეს? არ უნდა გაანალიზოთ? დასკვნები არ უნდა გამოიტანოთ? მოდით მე მოგეხმარებით ამაში, და ჩემში ეჭვების შეტანის მაგივრად იქნებ თქვენი ქრისტესმიერი ძმა და მეგობარი დაინახოთ? და ის მაინც არ იფიქროთ, რომ მართული ვარ ადამიანისგან! ერთს ვაღიარებ მხოლოდ, რომ მართულობას ვისურვებდი მხოლოდ ანგელოზის მიერ და არამც და არამც ადამიანის მხრიდან, თუმცა თავისუფალი ნება ამას კრძალავს, ხოლო იმას, რასაც თქვენ უშვებთ ჩემს მიმართ ქვია „სტუკაჩობის“, დასმენების და მონობის ინსტიტუტი და მე ამას ვერ მივიღებ და თქვენც დაინახავთ მალე, რომ სიცოცხლით ვარ პასუხისმგებელი უფლის წინაშე რომ ეს ასეა. მოკლედ თავის მართლების მაგივრად ეხლა გადავალ ანალიზზე იმისა, თუ რას გულისხმობს წმინდა ბერის ზემოთმოყვანილი ფრაზა, მანამდე კი მიგითითებთ, რომ როგორც წმინდა ბერს უყვარდა ზვიადი, ასევე არანაკლებად მიყვარს მეც იგიც და სამშობლოც და თქვენც. როდესაც მოგყავთ ერთი ფრაზა, იქვე უნდა მეორეც გაიხსენოთ და არ მიჩქმალოთ, რადგან ეს, ელემენტარულად რომ ვთქვათ არის არაეთიკური და ფაქტების მიჩქმალვის მცდელობა, საზოგადოების შეცდომაში შეყვანა. მაშ, ასე:
    1. თქვენ ამბობთ: „ბუნებრივია ასეთი კითხვები გაუჩნდება კაცს, როდესაც ხედავს კარდინალურად როგორ იცვლება თქვენი დამოკიდებულება მდუმარე ბერისადმი და ახლა უკვე იმ ხალხს აქებთ და ადიდებთ (გვერდში უდგახართ) ვინც დევნიდა და დღესაც დევნის მას?! ასევე წმინდა ბერი გაბრიელის მეხოტბე ადამიანი არ იზიარებთ მის ერთერთ (მთავარ) მოსაზრებას: „ზვიადის მტერი, ერის და სარწმუნოების მტერია!!!“ ამის გამო დევნიდნენ მას, გასული საუკუნის 90-იან წლებში სამშობლოს გამყიდველთა კასტა, სასულიერო – საერო საზოგადოებიდან და ახლა მისი ყველაზე „გულანთებული“ მიმდევრები გახდნენ?! ნუთუ თქვენც იმ „კოჰორტის“ წევრი ხართ, რომლებიც ტყვიას არ იშურებდნენ საკუთარი თანამოძმეებისადმი?“
    2. მამა გაბრიელს, ზვიადის გამო, არავინ არ დევნიდა და ეს არის წმინდა წყლის ტყუილი და მიკერძოებული ასახვა რეალური ფაქტებისა, არ გრცხვენიათ? პირიქით, წმინდა ბერი აფრთხილებდა მას (ზვიადს), რომ ნუ ჩქარობო, დაღუპვისაკენ წაიყვან ერსო და ღვთისმშობლის ხატიც კი გაატანა – „ამ ხატმა გიშველოს შვილოო“ – დააყოლა დამშვიდობებისას. ამასაც ანალიზი უნდა? ესეც სიცრუეა? ჩვენ, ყველას გვიყვარს სამშობლო, და ყველა ერისკაცი მითუმეტეს წამებული (ილია, ზვიადი, მერაბი, მეფენი, ერისკაცნი), მაგრამ თვალს ვერ დავხუჭავთ შემდეგზე:
    3. როდესაც 30 000 კაცი დიდი ხნის განმავლობაში, ხანგრძლივად იძახის ადამიანის სახელს და ადიდებს მას, ეს გახლავთ (იმედი მაქვს, რომ გაუთვითცნობიერებელი) როგორც მინიმუმ შეუგნებელი კერპთთაყვანისცემის მაგალითი და ადრესატი, მართლმადიდებელი ადამიანი ვალდებულია ყველანაერი გზა იხმაროს, რომ შეაჩეროს ეს პროცესი და მიუთითოს ერს მსგავსი მანკიერების აღმოფხვრისაკენ! ასეთივე საშინელებაა ჩვენი ეხლანდელი ჰიმნიც, სადაც დიდებას და ხოტბას ასხამენ თავისუფლებას და არა უფალს (სწორედ ამიტომ მღეროდნენ მას დღეს რუსთავი 2-ის მიტინგზეც), ვინც გვანიჭებს თავისუფლებას და სიცოცხლეს და ვინც მხოლო არის ღირსი დიდებისა უკუნისანდე!
    4. სრულიად გაუმართლებელია რელიგიური ცნობიერებისათვის გამოყენება მმართველობაში ისეთი ინსტიტუტებისა, რომლებიც ჩანასახშივე ებრძვიან მართლმადიდებლურ ცნობიერებას და ღვთივკურთხეული, მირონცხებული მეფის მამრთველობისაკენ სვლის მაგივრად ამკვიდრებდეს მასონური პრეზიდენტის ინსტიტუტს და უფრო მეტიც, თვითონვე ირგებდეს ამ ბერკეტს! მე მთელი შეგნებით ვეწინააღმდეგებოდი 1991 წელს ამას და ამის მოწმეები არიან მერაბ კიკნაძეც და გოგი გულბანიც და ზუსტად ასე ვუსაბუთებდი მათ ამ პროცესის დამღუპველობას, მაგრამ რად გინდა? ვინ შეისმინა? მითუმეტეს, მაშინ, როდესაც ირგვლივ, საპასუხისმგებლო პოსტებზე გახვევია მოღალატური გარემოცვა, საჭირო იყო უზუსტესი სვლების გაკეთება და სიბრძნე და ამ დროს ერთ კაცზე ძალაუფლების კონცენტრირება სწორედ ამ ძალაუფლების მარტივად დამხობის საწინდარი გახდა. ყოველივე ეს, კი გათვლილი ჰქონდა მაშინდელ უშიშროებას და მიზნად ისახავდა ზვიადის დამთმობი და არააგრესიული, შემწყნარებლური ხასიათის გამოყენებით ეროვნული სულის დახშობას და ამოძირკვას ქართული ცნობიერებიდან კარგა ხნით (მთლიანად რომ ვერ შეძლებდნენ ეს თქვენზე უკეთ მათაც ესმოდათ), რასაც მიაღწიეს კიდეც სულ რაღაც 6 თვეში. აი, თქვენეული 28 წლიანი „ბოღმის“ მიზეზი, მაგრამ ეს „ბოღმა“ ჩემში კი არა, ჩემს ძმა ლევან ჩაჩუაში კი არა, იმ ახალგაზრდა გულანთებულ და მყარად მართლმადიდებელ ქართველებში კი არა, არ მიწყინოთ, მაგრამ თქვენს თავში ეძებეთ და იქნებ აგეხილოთ თვალები და მიხვდეთ, რომ იმ ტელევიზიის შემქნელებს, რომელ ტელევიზიაშიც პირველივე გადაცემა „ენა, მამაული, სარწმუნოება“ იყო, არის და იქნება და ეს გადაცემა სწორედ უწმინდესმა გვიკურთხა და გვიკარნახა (დავით გიორგობიანს უთხრა პირადად) არ უნდა უკითხოთ მორალი იმის შესახებ თუ ერისთვის სამშობლო უფრო მეტია თუ სამყაროს შემოქმედი! და მე კიდევ ასჯერ გაგიმეორებთ, რომ ჯერ უფალს უნდა ვემსახუროთ და თუკი ამას შევძლებთ, აი ,მაშინ უფალი გვიკურთხებს სამშობლოს, რაც არის ადამიანთა ერთობა და თითოეული ადამიანის (თუნდაც მტრის) კეთილდღეობის მიღწევას გულისხმობს.
    5. თქვენ კადრულობთ და უშვებთ თქვენს აზროვნებაში გაუგონარი კაცთმოძულეობის პრეცენდენტს და გვაბრალებთ: „ამით თქვენ შეუერთდით იმ „სახელოვან ინტელიგენციას“, რომლებიც იმასაც კი ბედავენ ცინიკურად „იღადაონ“ (გვაპატიეთ ჟარგონისთვის) 100 000 წამებულსა თუ დიდგორის ომზე?! ეს ხომ თანამედროვე მანქურთთა ხელობაა.“ დალოცვილებო, ეს თავში როგორ მოგივიდათ? მე ეჭვი მეპარება, რომ ამ და სხვა ამის შემდეგი ფრაზების წაკითხვის შემდეგ თქვენ საერთოდ გესმოდეთ მოყვასის სიყვარულის არსი და მეტიც თქვენ მართლმადიდებელნი ხართ? ეზიარებით ქრისტეს სისხლს და ხორცს? თუ კი, მაშინ თქვე დალოცვილებო წადით და მოძღვარს მოუყევით ამის შესახებ და იქნებ აგიხსნათ თქვენმა მოძღვარმა, რომ მოყვასის ასე გაწირვა არის ელემენტარული სიძულვილი და რბილად რომ ვთქვათ (იმედი მაქვს გაუთვითცნობიერებლი) ბოროტება?
    6. თქვენ ისევ აგრძელებთ და ამბობთ: „ასეთი ისტორიის მქონე ერის შვილმა შეიძლება იკადროს და თქვას: „არავითარი საქართველო უპირველეს ყოვლისაო“???!!! ეს ხომ ერთ-ერთი მთავარი მოწოდება იყო 9 აპრილის დღეებში აზვირთებული ქართული სულისა! აი ამ აზვირთებულ სულს თელავთ თქვენ და ე. წ. „ქართული იდეა“??! “
    სად წაიკითხეთ და გაიგონეთ „არავითარი საქართველო უპირველს ყოვლისაო“? საიდან მოიტანეთ ეს? კიდევ ერთხელ გეუბნებით, რომ თქვენ მგონი (მეც მაპატიეთ ჟარგონი) „რამსები“ გერევათ და სამშობლოს აყენებთ სამყაროს შემოქმედის ადგილას, ჩვენ ყოველთვის, ყველაგან მხოლოდ იმას ვგულისხმობთ, რომ ეს ასე არ არის და არ შეიძლება რელიგიურობა გაიგივებულ იყოს სამშობლოს მცნებასთან! გაუტოლდეს მას! მთავარი ამ სამყაროში არის უფალი და შემდეგ ყველაფერი, აი, სწორედ ასეთი მსოფლმხედელობრივი ტრანსფორმაციაა მომხდარი თქვენს გონებაში 1989 წლიდან მოყოლებული და ჩვენ, როდესაც ამაზე მიგითითებთ, საშინელი რეაქცია და ზიზღი იფრქვევა თქვენგან. თქვენი მდგომარეობა დაახლოებით ისე გამოიყურება, როგორც აკაკი ბაქრაძისა ამ შეხვედრის დროს (იხილეთ ვიდეო https://www.youtube.com/watch?v=A7v6zHKQ3bc – 1:35:30 წუთიდან): „ყველა ჩვენთაგანი, მეტნაკლებად, რაღაცნაერად, იმის გამო, რომ წარსულში ქრისტიანები ვიყავით ვცდილობთ ამ მოძღვრებასთან რაღაცა კავშირი გვქონდეს“!!!!!!!!!!!! (აკაკი ბაქრაძე)! ეს სიტყვები და თქვენი განაჩენი ჩემს მიმართ (იმედია არა საბოლოო) არის კატასტროფა და ღვთის მგნობი აზროვნების ტოლფასი. წმინდა გაბრიელ ბერი ხშირად იმეორებდა: „მალხაზი, (მალხაზ ჯინორიას მიამრთავდა) მე რომ ჩემი თავი შენზე ოდნავ მაინც მეტი ან უკეთესი მეგონოს, საზიზღარი ვიქნები უფლის წინაშე“. მეც იგივე სითბოთი და სიყვარულით მოგიწოდებთ ჩემო მოყვასნო და მთელი არსით ვუერთდები ამ (და არა მარტო ამ სიტყვებს) სიტყვებს წმინდა ბერისა, რომელმაც ქრისტე მასწავლა, შემაყვარა და ეხლაც კი იმედია მკარნახობს რასაც ვწერ და თქვენ რა დაგიშავეთ? რისთვის მიმეტებთ, ჯოჯოხეთისთვის? გეენისთვის? ჭეშმარიტად გეუბნებით, რომ ერთი თქვენთაგანი კი არა და ერთი ადამიანიც რომ მძულდეს საზიზღარი ვარ უფლის თვალში და ამასაც სწორედ წმინდა გაბრიელ ბერის დახმარებით მივაღწიე თუკი არ მეჩვენება, რომ არ მძულს. მე ,ამ ბოლო დროს, ბევრგან წავიკითხე, რომ თურმე წმინდა გაბრიელ ბერი და მამა ნიკოლოზი გამოვიყენე კარიერისტული მიზნებისთვის და ხალხში მოვიპოვე პოპულარობა და შემდეგ ისინი გვერდზე გავწიე (ე.წ. „ძლევაი საკვირველი“ , მამა ნიკოლოზის ე.წ. „მრევლი“ და სხვ), ესეც გაუგონარი ცილისწამებაა და ელემენტარულად იმისაც კი ვერ ხვდებით, რომ ასე რომ იყოს, როგორ, წმინდა ბერი და მისი მორჩილი არ მამხელდა ამაში? მაგდენი ძალა და ნება არა აქვთ, რომ ასეთი გაუგონარი მზაკვრობა აღხოცონ და გამაჩერონ? ან გამიჩერონ ტელევიზია, რომელსაც ზურგით და საკუთარი ჯიბით ვინახავ იმისთვის, რომ სიმართლე არ დაიკარგოს? რა გულით არ მივიღეთ თქვენი წრიდან ნიკო ნადირაშვილი და გვერდით არ ვუდექით? საიდან ასკვნით ასეთებს ადამიანებო? მოდით აქ გავჩერდები და ჩემს პასუხს თქვენს ღია წერილზე ამ ისტორიით დავამთავრებ: „ერთხელ უწმინდესს მიუტანეს საპატრიარქოს თანამშრომლის დაწერილი წერილი (ეს ხდება დაახლობით 14 წლის წინ), სადაც აღწერილი იყო გარკვეული მანკიერი მოვლენების შესახებ. უწმინდესმა ავტორი თავისთან მოიხმო და 2 კითხვა დაუსვა: – შვილო, ეს შენ დაწერე? – დიახ უწმინდესო – მიუგო ავტორმა, – მე მხოლოდ ერთი კითხვაღა მაქვს შენთან შვილო, – მკითხეთ უწმინდესო – ღამე როგორ გძინავს შვილო?“
    7. ღმერთმა დაგლოცოთ ყველანი, ვინც სამშობლოზე, მოყვასზე, სიკეთეზე, ცხონებაზე და თუნდაც ჩემზე ფიქრობთ, გაგახაროთ მამაზეციერმა ორთავ სოფელსა შინა და თქვენს ბოლო მოწოდებას „საქმემან შენმა გამოგაჩინოს შენო“ ამ ეტაპზე, ამ ვიდეოთი ვუპასუხებ, ხოლო დანარჩენს კი დარჩენილი ცხოვრებით დედამიწაზე. https://www.youtube.com/watch?v=By9pFteQW00

    ღმერთმა დაგლოცოთ!!!

    გიორგი ასათიანი
    20.02/2017

კომენტარის დატოვება

Fill in your details below or click an icon to log in:

WordPress.com Logo

You are commenting using your WordPress.com account. Log Out / შეცვლა )

Twitter picture

You are commenting using your Twitter account. Log Out / შეცვლა )

Facebook photo

You are commenting using your Facebook account. Log Out / შეცვლა )

Google+ photo

You are commenting using your Google+ account. Log Out / შეცვლა )

Connecting to %s

 
%d bloggers like this: